Hivi Mwalimu Nyerere alikuwa Yanga au Simba?

Hivi Mwalimu Nyerere alikuwa Yanga au Simba? Hili ni swali ambalo nimewahi kuulizwa sehemu ambayo sikutarajia kabisa kuulizwa.

Mwaka 2012, nikiwa kwenye moja ya misafara yangu ya kukwea Mlima Kilimanjaro nikiongozana na walimu na wanafunzi wa Shule ya Sekondari ya Wasichana ya Loreto ya Mwanza, nilipokea simu wakati tukitembea kati ya kambi ya Horombo na kambi ya Kibo.

Aliyenipigia simu alijitambulisha akisema mimi hununua vocha za simu kwenye kibanda chake mjini Musoma.

Alinisimulia kuwa alikuwa anabishana na wenzake, baadhi yao wakisema Mwalimu Nyerere alikuwa mwanachama wa Yanga, wengine wakipinga na kusema siyo kweli. Akaniomba mimi nimalize ubishi wao.

Kwanza, ingawa nilikuwa kwenye njia ya Marangu kuelekea kwenye kilele cha Mlima Kilimanjaro, njia ambayo inasemekana kuwa ni moja ya njia rahisi za kufika kileleni, ukweaji Mlima Kilimanjaro wakati wote unampa mtu changamoto za kila aina.

Mawasiliano ya simu za kiganja huwa ni ya kubahatisha kutegemea na sehemu ulipo na kutegemea na hali ya hewa. Mlimani kwenyewe pumzi inavutika kwa kutumia nguvu na jitihada ya ziada. Aidha, kwa sababu ya baridi chaji ya betri ya simu haikai kwa muda mrefu.

Kwa sababu hizo, unapopigiwa simu, unategemea itahusiana na suala la dharura au linalohusiana na kazi au suala lingine la aina hiyo.

Lakini nilielewa kuwa, kwa aliyenipigia simu, kufahamu kama Mwalimu Nyerere alikuwa mwanachama wa Yanga au la ilikuwa muhimu kwake kwa wakati ule.

Nilimwambia kuwa hata mimi husikia kuwa Mwalimu Nyerere alikuwa mwanachama wa Yanga, na wakati fulani wazee wa Yanga walitembelea Butiama nikawauliza swali hilo lakini kwa wakati ule aliponiuliza sikukumbuka walinijibu nini.

Ninachokumbuka ni kusikia mtu akisema kuwa kadi namba 1 ya Dar es Salaam Young Africans huwa haijulikani kapewa nani, na ndiyo hiyo watu wanasema ilikuwa kadi ya Mwalimu Nyerere.

Mwalimu Nyerere mwenyewe aliposimulia kuhusu kuhudhuria mechi za soka alisema ilikuwa muhimu kuwa asikae mtu mbele yake, kwa sababu kila wakati mchezaji alipokaribia kufunga goli naye alikuwa akirusha mguu mbele kupiga mpira hewa.

Bofya kwenye picha hapo chini kusoma taarifa juu ya mechi chache za mpira ambazo Mwalimu Nyerere alihudhuria:

Mwaka 1972, Rais Jaffar El Nimeiry wa Sudan akisalimiana na wachezaji wa Taifa Stars kwenye Uwanja wa Taifa, Dar es Salaam, kwenye mechi ya soka dhidi ya timu ya taifa ya Sudan.

Taarifa nyingine kama hii:
http://muhunda.blogspot.com/2013/07/simba-sports-club-wakaribishwa-butiama.html

Baraka Elias, Mtanzania mrefu kuliko Watanzania wote

Nimewahi kuonana na Baraka Elias, Mtanzania mrefu kuliko Watanzania wote, alipotembelea Butiama mwaka 2012. Ana urefu wa mita 2.20 na umri wa miaka 27.

Kwenye picha juu ni yeye pamoja na Notburga Maskini anayeongea naye, kushoto. Notburga tumewahi kuongozana naye kwenye moja ya misafara yangu ya kukwea Mlima Kilimanjaro.

Taarifa nyingine za Baraka Elias hizi hapa (kwa Kiingereza):

http://madarakanyerere.blogspot.com/2012/05/baraka-elias-tallest-tanzanian-just.html

Taarifa nyingine za Notburga Maskini hizi hapa (kwa Kiingereza):

http://madarakanyerere.blogspot.com/2009/10/on-mt-kilimanjaro-again-post-1-of.html

Leo kumbukumbu ya kufariki Hayati Alex Nyirenda

Leo ni miaka mitano tangu kufariki Hayati Brigedia Alex Gwebe Nyirenda aliyefariki Dar es Salaam mwaka 2008 kwa ugonjwa wa saratani ya koo.

Usiku wa tarehe 8 Desemba mwaka 1961, muda mchache kabla ya kutimia saa 6:00 kamili usiku, siku ambapo Tanganyika ilipata uhuru wake, Brigedia Nyirenda alikuwa kileleni mwa Mlima Kilimanjaro kupandisha bendera ya taifa jipya la Tanganyika wakati bendera ya Uingereza ilipokuwa inateremshwa kwenye uwanja wa Taifa, Dar es Salaam.

Luteni Alex Nyirenda, akiwa na bendera ya Tanganyika na Mwenge wa Uhuru kwenye kilele cha Mlima Kilimanjaro siku Tanganyika ilipopata uhuru wake, tarehe 9 Desemba 1961. (Picha ya Idara ya Habari, Maelezo

Miaka mwili kabla, tarehe 22 Oktoba 1959, Mwalimu Julius Kambarage Nyerere, akihutubia Baraza la Kutunga Sheria, alisema yafuatayo:

Sisi watu wa Tanganyika tunataka kuwasha mwenge na kuuweka juu ya Mlima Kilmanjaro umulike nje ya mipaka yetu na kuleta tumaini pale ambapo kulikuwa hakuna matumaini, upendo pale ambapo palikuwa na chuki, na heshima pale 
palipojaa dharau.

Miaka miwili kabla, tarehe 22 Oktoba 1959, Mwalimu Julius Kambarage Nyerere, akitoa hotuba kwenye Baraza la Kutunga Sheria, alisema yafuatayo: 

Huu mwenge ambao baadaye ulikuja kujulikana kama Mwenge wa Uhuru ulisimikwa juu ya Mlima Kilimanjaro na Nyirenda, ukiashiria msimamo wa muda mrefu na usiotetereka wa Tanzania kuunga mkono juhudi za ukombozi wa nchi za Kiafrika ambazo katika miaka ya mwanzo ya sitini zilibaki chini ya ukoloni na tawala za kibaguzi.

Mwaka 1958 Nyirenda alikuwa Mtanganyika wa kwanza kuhitimu kutoka Chuo cha Kijeshi cha Sandhurst cha nchini Uingereza. Aidha, kabla ya uhuru, alikuwa Mwafrika wa kwanza kuwa afisa ndani ya Kings African Rifles, jeshi la kikoloni la Uingereza ambalo baada ya uhuru ndiyo likabadilishwa na kuwa Jeshi la Wananchi wa Tanzania (JWTZ).

Alikuwa na uhusiano wa kiukoo na rais wa zamani wa Zambia, Dk. Kenneth Kaunda, jambo ambalo linakumbusha Waafrika kwamba wako karibu sana kuliko mipaka ya nchi zao inavyoashiria.

Msafara mwingine wa Mlima Kilimanjaro wamalizika, safari hii kuchangia pesa kwa shule ya Kichalikani

Ndiyo kwanza nimemaliza kukwea Mlima Kilimanjaro katika mwaka wa 6 wa The Mwalimu Nyerere/Mt. Kilimanjaro Charity Climb kuchangisha pesa kwa ajili ya kukamilisha ujenzi wa shule iliyopo kwenye kijiji cha Kichalikani, wilayani Mkinga, mkoa wa Tanga.

Pamoja nami katika msafara wa Mlima Kilimanjaro alikuwa E. Gassana. Tulifika kwenye kilele cha Mlima Kilimanjaro asubuhi ya tarehe 5 Oktoba, saa 2:30 asubuhi.

Kwenye kilele cha Mlima Kilimanjaro, mita 5,895 juu ya usawa wa bahari na sehemu iliyo juu kuliko zote katika bara la Afrika, kutoka kushoto: Pius Yahoo, muongozaji wetu; E. Gassana; mwandishi wa blogu hii; na Musa Juma, muongozaji msaidizi.

Wakazi wa kijiji cha Kichalikani walianza ujenzi wa shule mwaka 2009 kwa kutumia sehemu ya ushuru uliokusanywa kwenye soko la samaki. Baada ya kuona jitihada hizi, Saidi Masimango, aliyekuwa Mkurugenzi wa Idara ya Teknolojia na Habari ya Shirika la Hifadhi ya Jamii alichangia shilingi milioni moja. Masimango alifariki mwezi Julai 2013.

Aidha, Mkuu wa Wilaya ya Rufiji, Nurdin Babu, naye alichanga mabati 33, wakati Mkuu wa Mkoa wa Pwani, Mwantumu Mahiza alitoa mabati 100.

Kiasi cha shilingi milioni 7 zinahitajika kumalizia kazi za ujenzi ambazo hazijakamilika pamoja na kununua madawati.

Tafadhali changa kwa njia zifuatazo:

Jina la Akaunti: Kijiji cha Kichalikani

Benki: National Microfinance Bank

Namba ya Akaunti: 4193300163

Tawi: Mkwakwani, Tanga.

Wanaochangia wanaombwa kutuma majina kamili na viwango vilivyotolewa (kwa madhumuni ya kuchapisha orodha kamili kwenye gazeti la Jamhuri) kwa:

 madaraka.nyerere@gmail.com

Hata wasiopenda majina yao yachapishwe nao wanaombwa kuwasilisha hizo taarifa kwa njia hiyo ya barua pepe (majina hayatachapishwa).

Kuchangia kwa njia ya simu tumia namba ifuatayo (pesa zitakusanywa na kuwekwa kwenye akaunti ya benki iliyotajwa juu):

+255 755 570 795

Maandalizi ya kukwea Mlima Kilimanjaro mwezi Septemba yameanza

Juzi nimeanza rasmi maandalizi (ya mazoezi) ya kukwea tena Mlima Kilimjaro mwezi Septemba mwaka huu, kuanzia tarehe 23 hadi 30 Septemba. Safari hii nitakuwa nachangisha pesa kuchangia ujenzi wa shule ya msingi iliyopo kijiji cha Kichalikani, mkoa wa Tanga. Yanahitajika mazoezi ya siyo chini ya miezi mitatu kujiandaa vyema kukabiliana na changamoto ya kufika kwenye kilele cha Mlima Kilimanjaro, mita 5,895 juu ya usawa wa bahari.

Hii ni safari ambayo awali nilipanga ifanyike mapema mwaka huu lakini nililazimika kuiahirisha kutokana na majukumu mengine yaliyonikabili.

Mandhari mwanana kwenye njia ya Marangu ya Mlima Kilimanjaro.

Moses Kusotera, raia wa Zimbabwe anayeishi na kufanya kazi nchini Uingereza, ataungana nami kukwea mlima huu maarufu pamoja na kuchagnisha pesa za shule ya Kichalikani.

Ukitaka kujiunga nami niandikie barua pepe kwa kubofya hapa.

Taarifa nyingine zinazohusiana na hii:
http://muhunda.blogspot.com/2013/01/kunguru-wa-mlima-kilimanjaro.html
http://muhunda.blogspot.com/2011/07/wagumu-wa-mlima-kilimanjaro.html

Wahisani wachangia mabati 33 kwa ujenzi wa shule Kichalikani

Agnes Mambo anaarifu kuwa mabati 33 yamepokelewa hivi karibuni kuchangia ujenzi wa shule ya Msingi Kichalikani iliyopo Wilaya ya Mkinga mkoani Tanga.

Katika jitihada za kuchangia shule hiyo, mimi natarajia kukwea Mlima mwezi Juni 2013 kuchangisha pesa kwa ajili ya kuendeleza ujenzi huo. Msafara wangu ulipangwa mwezi huu lakini nimelazimika kuahirisha mpaka mwezi Juni.

****************************************

Na Agnes Mambo,MKINGA.
MKUU wa wilaya ya Rufiji mkoani Mwapwani, Nurdini Babu, na Mkurugenzi wa idara ya Teknolojia ya Habari IT, katika Shirika la Taifa la Hifadhi ya Jamii (NSSF) la jijini Dar es salaam, Said Masimango, wametoa msaada wa bati 33 zenye thamani ya Shilingi 760,000/- katika shule ya Msingi Kichalikani wilayani Mkinga mkoani Tanga.

Jengo la Shule ya Msingi Kichalikani.

Akikabidhi msaada huo kwa niaba ya mkuu wa wilaya ya Rufiji mkoani Pwani mwenyekiti wa Tanga Village Support, Hassani Kibhondah, amesema kuwa lengo la kutoa msaada huo ni kusogeza huduma ya elimu karibu kutokana na wanafunzi wa eneo hilo kutembea umbali wa kilometa tatu kutoka Kichalikani hadi Shule ya Msingi Mongavyeru.

Mwenyekiti huyo amesema kuwa wadau hao wameguswa na kuchangia ujenzi wa shule hiyo ambayo ilianza kujengwa tangu mwaka 2009 kwa nguvu za wananchi wenyewe ambapo hadi sasa kuna vyumba viwili vya madarasa na ofisi mbili ,hivyo ameomba wapenda maendeleo kuguswa na suala hilo ili ujenzi uweze kukamilika.

Kwa upande wake mwenyekiti wa kamati ya ujenzi wa shule ya msingi Kichalikani, Jambia Ally Kubo, amesema kuwa watoto wanapata adha kubwa kutokana na maji ya bahari kujaa katika kisiwa hivyo kushindwa kuvuka ambapo wameiomba Halmashauri ya Wilaya ya Mkinga kuchangia ujenzi wa shule hiyo.

Naye Mjumbe wa serikali ya kijiji cha Kichalikani, Amina Muhaji, awameshukuru wadau hao waliotoa vifaa hivyo ambapo amesema kuwa wanafunzi wanachapwa kutokana na kuchelewa kufika shule. Aliongeza kusema kuwa baadhi ya wanafunzi wanashindwa kuendelea na masomo wakihofia maisha yao kwa sababu ya kupita katika jangwa na kisiwa na kushindwa kuvuka.

Taarifa zinazohusiana na hizi:

http://muhunda.blogspot.com/2012/06/mwanzo-wa-msafara-wa-mlima-kilimanjaro.html

Kunguru wa Mlima Kilimanjaro

Kuna viumbe wachache ambao wanahimili hali ya hewa ya baridi ya kwenye Mlima Kilimanjaro. Mmoja wa hao viumbe ni kunguru, mahususi wale ambao pia wanajulikana kama Kunguru wa Shamba.

Hawa kunguru wanaonekana Mlima Kilimanjaro mpaka kwenye urefu wa mita 4,800 juu ya usawa wa bahari, kwenye Kambi ya Barafu. sehemu ambayo ina baridi kali.

Viumbe wengine ambao wanaonekana mpaka urefu huo juu ya usawa wa bahari ni pamoja na panya wadogo.

Taarifa nyingine zinazohusiana na taarifa hii:
http://muhunda.blogspot.com/2012/03/kambi-ya-barafu-ya-mlima-kilimanjaro.html
http://muhunda.blogspot.com/2011/09/mimea-ya-mlima-kilimanjaro.html
http://muhunda.blogspot.com/2011/07/wagumu-wa-mlima-kilimanjaro.html

Mlima Kilimanjaro unapendeza zaidi tokea Tanzania au Kenya?

Kuna mdau hapa anauliza swali: Mlima unaonekana vizuri tokea Tanzania au Kenya? Huyu mdau anahisi kuna hujuma inafanywa na jirani zetu kuvutia wageni wengi zaidi waende Kenya na ndiyo maana hoja hii inaibuliwa.

Hili swali halipaswi hata kuulizwa. Mlima Kilimanjaro unavyoonekana kutokea Kenya ni tofauti kidogo na unavyoonekana upande wa Tanzania. Kama kuna mtu kapendezewa na taswira ya mlima tokea Kenya huwezi kumlazimisha afurahie taswira ya mlima huo kutoka upande wa Tanzania.

Lakini huu utaratibu wa kulalamikia jirani zetu wa Kenya kunufaika na Mlima Kilimanjaro wakati sisi wenyewe tumekaa na kuongea tu pia hauna manufaa yoyote kwa maendeleo yetu.

Ninavyoamini mimi, mgeni yoyote aliyetoka nje ambaye amekuja kukwea mlima huu maarufu hajali kama uko Kenya, Tanzania, au kwenye sayari ya Zuhura. Mgeni anavutiwa na mlima wenyewe na siyo mipaka ya nchi.

Mimi nimeshakwea Mlima Kilimanjaro mara kadhaa na ukweli ni kuwa ni Watanzania wachache sana wanakwenda huko kulinganisha na wageni wa nje. Kwa kweli kule mlimani Mtanzania ndiyo mgeni na wageni ndiyo wenyeji kwa sababu idadi yao ni kubwa sana. Hivi karibuni nimekutana na Wakenya kibao kwenye njia ya Marangu wakielekea kileleni.

Mimi ningefurahi sana kuona hawa wenye uchungu na mlima huu kusemwa uko Kenya basi wawe wanajitokeza mara moja moja nao kukwea huu mlima. Hiyo itawawezesha kuzungumzia mlima wao kwa kujiamini badala ya kuuliza maswali tu na kulalamika.

Mlima Kilimanjaro unavyoonekana kutoka upande wa Tanzania.

Kitu ambacho watajifunza ni kuwa mandhari nzuri kuliko zote za mlima huu ziko huko huko mlimani. Lakini haya ni maoni yangu tu.

Mwanafunzi wa kidato cha nne afika kilele cha Mlima Kilimanjaro

Mwanafunzi Placidia Prudence wa Shule ya Sekondari ya Wasichana Loreto ya jijini Mwanza ambaye alikuwa kwenye msafara wa kukwea Mlima Kilimanjaro amefanikiwa kufika kilele cha mlima huo tarehe 28 Septemba 2012.

Nami nilikuwa kwenye msafara huo ambao ulishirikisha wanafunzi wengine 15 toka shule hiyo pamoja na walimu watatu. Katika wote tulioshiriki ni yeye peke yake alifanikiwa kufika kileleni ambako alifika akiongozana na muongozaji Entold Mpunga.

Placidia Prudence akiwa kwenye kambi ya Horombo baada ya kufika kwenye kilele cha Mlima Kilimanjaro. Kushoto, juu, unaonekana Mlima Kilimanjaro.

Mwanafunzi Nusra Alkarim, mwalimu wa michezo Isack Katambi, na mimi tulifanikiwa kufika Gillman's Point, mita 5,685 juu ya usawa wa bahari na kiasi cha mwendo wa kama saa moja na nusu toka kilele cha Uhuru alikofika Placidia. Kilele cha Mlima Kilimanjaro kina urefu wa mita 5,895 juu ya usawa wa bahari.

Msafara huo ulipangwa kwa madhumuni ya kuchangisha pesa za mradi wa kuboresha na kufikisha maji safi na salama kwenye shule ya Loreto.

Placidia ana umri wa miaka 20 na ameniarifu anakusudia kuwa mhandisi.

Mwanzo wa msafara wa Mlima Kilimanjaro

Tarehe 10 Juni 2012 nimemaliza msafara mwingine wa kukwea Mlima Kilimanjaro nikiwa pamoja na kundi la watu 14 katika msafara uliyokuwa na madhumuni ya kuchangisha pesa kwa ajili ya ujenzi wa maktaba ya Shule ya Sekondari Nyegina.

Kutegemea na njia inayotumika, msafara wa kwenda kilele cha Mlima Kilimanjaro unachukuwa kati ya siku 5 hadi 10. Msafara wetu ulichukuwa siku 7 kwenye njia ya Lemosho inayoanzia kwenye lango la Londrossi.

Katika siku ya pili ya msafara, kilele cha Kibo kilionekana mbele yetu kwenye uwanda wa juu wa Shira na kumpa kila mmoja shauku ya kufika kileleni. Wawili kati ya ya 14 tulioanza hawakufanikiwa kufika kileleni. Habari kamili zitawekwa hapa hivi karibuni.

Maandalizi ya kupanda Mlima Kilimanjaro mwezi ujao

Kuna maandalizi mengi muhimu katika kujiandaa kupanda mlima Kilimanjaro. Suala moja muhimu sana ni kufanya mazoezi ya kutosha kabla ya kwenda mlimani, mazoezi yanayopaswa kufanywa kwa muda wa miezi mitatu kabla ya msafara.

Kuna viatu maalum kwa ajili ya kukwea milima mirefu. Wataalamu wanashauri kuwa viatu hivyo vitumike kwanza kabla ya kuanza msafara na vivaliwe kwa muda ili mtumiaji avizowee. Kutumia viatu kabla ya msafara kunasaidia pia kufahamu iwapo havibani sana na vinamtosha mtumiaji barabara.

Nikiwa najiandaa kueleka tena Mlima Kilimanjaro mwezi ujao kwa mara ya tano nikiwa na kundi la wageni toka Marekani ambao pamoja nao tunachangisha pesa kwa ajili ya ujenzi wa maktaba ya shule ya Sekondari ya Nyegina iliyopo jirani na Musoma, nimeanza kutumia viatu hivi juma moja kabla ya kuanza msafara wa kupanda Mlima Kilimanjaro. Viatu hivi nimeshavitumia mara kadhaa kwenye misafara iliyopita ya Mlima Kilimanjaro.

Kambi ya Barafu ya Mlima Kilimanjaro

Kambi ya Barafu ya Mlima Kilimanjaro iko usawa wa Mita 4,800 juu ya usawa wa bahari. Ni kutokea kambi hii ndipo wengi wanaoelekea kilele cha Uhuru huanza safari yao saa 5 usiku.

Safari ya kufika kileleni hukamilika kati ya saa 12:00 alfajiri hadi saa tatu asubuhi, ikitegemea kasi ya mwendo.

Vibanda vya mviringo vya wahifadhi vilivyopo Kambi ya Barafu.

Vibanda vya mviringo katikati ni vya wahifadhi wa Mamlaka ya Hifadhi ya Mlima Kilimanjaro, sehemu ambapo kila mgeni hujisajili anapowasili kambini.

Jim Becket, Jaffar Amin, na Andrea Wobmann watarajia kupanda Mlima Kilimanjaro wiki ijayo

Niko njiani kuelekea Moshi kwa ajili ya maandalizi ya kupanda Mlima Kilimanjaro chini ya The Mwalimu Nyerere/Mt. Kilimanjaro Charity Climb. 

Nilikusudia kusafiri moja kwa moja hadi Moshi kupitia njia ya Serengeti lakini kwa bahati mbaya sikufanikiwa. Hivi sasa niko Mwanza na natarajia kufika Moshi kesho kupitia Uwanja wa Ndege wa Kimataifa wa Kilimanjaro (KIA).

Kutokana na maandalizi hafifu ya uchangishaji wa pesa za hisani ambao nafanya kila mwaka ninapokwea Mlima Kilimanjaro, yawezekana kuwa azma ya kuchangisha pesa za hisani haitafana sana mwaka huu. Katika siku chache zijazo na kabla ya kuanza msafara nitafanya uamuzi iwapo itawezekana kufanikisha kuchangisha pesa za hisani au iwapo nitalazimika kuahirisha uchangishaji huu mpaka msafara ujao wa kukwea Mlima Kilimanaro.

Suala lingine katika msafara wa mwaka huu ni kuwa muongozaji mashuhuri wa filamu toka nchini Marekani, Jim Becket, anakusudia kupiga picha za filamu wakati wa msafara huu. Jaffar Amin naye anatarajia kuungana nami katika msafara huu kutokana na makubaliano yetu wakati wa msafara wa mwaka jana kuwa tutaendeleza jitihada za kuchangisha pesa za hisani.

Kwa kuwa Jaffar atakuwa nasi, Jim anakusudia kujumuisha ndani ya filamu yake historia ya mahusiano kati ya Tanzania na Uganda na jinsi gani haya mahusiano yamebadilika, akijikita juu ya malengo ambayo mimi na Jaffar tunayo katika masuala ya hisani.

Mwanadada Andrea Wobmann ambaye amewahi kufanya kazi ya kujitolea jijini Mwanza naye pia anajiunga nasi kuukwea Mlima Kilimanjaro

Mimea ya Mlima Kilimanjaro

Mlima Kilimanjaro una mimea ambayo haipatikani sehemu nyingine yoyote duniani. Mmea huu unaitwa Giant Groundsel (jina la kisayansi ni Senecio 

keniodendron) na hustawi kwenye maeneo ambayo kwa kawaida yana ukungu mwingi. Kwenye picha ya hapo juu ni eneo lililopo karibu na kambi ya Barranco iliyopo mita 3,900 juu ya usawa wa bahari.

"Wagumu" wa Mlima Kilimanjaro

Mgeni yoyote anayepanda mlima Kilimanjaro anahitaji huduma ya waongoza msafara, wapishi, na wabeba mizigo. Hili kundi la mwisho wanajulikana kama “wagumu” kwa sababu ya ugumu wa kazi wanayofanya ya kumbebea mgeni vitu muhimu vinavyohitajika: mahema, chakula, maji, na vifaa vingine vya lazima.

Mgumu (kushoto) akiwa na mzigo wake baada ya kumpita Muongoza Msafara (mwenye kofia nyekundu) anayeongoza mgeni aliye nyuma yake.

Asubuhi wao huamka mapema kuandaa kifungua kinywa kwa wageni wakishirikiana na mpishi. Baada ya kifungua kinywa Muongoza Msafara (ambaye naye huanza kazi kama mbeba mizigo kwa miaka kadhaa) huongoza msafara wa wageni kuelekea kwenye kambi inayofuata. Msafara wa kukwea Mlima Kilimanjaro unaweza kuchukuwa kati ya siku 5 hadi 12, kutegemea na njia inayotumika.

Baada ya msafara kuondoka kambini, wagumu huvunja kambi na kufungasha mahema na mizigo mingine yote na kuanza safari ya kuelekea kambi inayofuata. Kwa kuwa ni wazoefu wa kubebea mzigo, huupita msafara wa wageni na Muongoza Msafara na msafara unapofika kwenye kambi wageni wanakuta wagumu wameshasimika upya mahema yote, na mpishi anakuwa tayari ameshapika chakula cha wageni. Wanafanya hivi kila siku ya msafara.

 

Wagumu wanayo sifa ya kutumia pesa inayotokana na kazi yao ya kusindikiza wageni kupanda Mlima Kilimanjaro kwa fujo. Dada mmoja mhudumu wa baa moja ya mjini Moshi aliniambia baadhi yao wanapolipwa pesa yao huhamia baa mpaka pesa iishe. Pesa inapoishia kwenye pombe, wengine hujisababishia majeraha ya mwili na kudanganywa wake zao kuwa wameporwa malipo yao na vibaka.

Wagumu wa Kilimanjaro wakifurahia siku ya mwisho ya msafara katika Kambi ya Mweka.

 Hii ndiyo baadhi ya mikasa ya wagumu wa Kilimanjaro.

Wagumu wa Kilimanjaro wakifurahia siku ya mwisho ya msafara katika Kambi ya Mweka.

Mlima Meru, wa pili kwa urefu Tanzania, wa 72 ulimwenguni

Mlima Meru ni Mlima wa pili kwa urefu Tanzania baada ya Mlima Kilimajaro. Una urefu wa mita 4,565 juu ya usawa wa bahari na unaorodheshwa kushika nafasi ya 72 kwa milima mirefu kuliko yote duniani. Mlima Meru uko mkoa wa Arusha, ndani ya Hifadhi ya Taifa ya Arusha.

Mlima Meru ukionekana kutoka Arusha.

Watu wengi wanaoparamia milima kama mimi huanza kupanda milima rahisi kwanza kabla ya kwenda kwenye ile yenye kutoa changamoto kubwa zaidi. Wengi hupanda Mlima Meru kabla ya Kilimanjaro, ingawa mimi nimeanza kupanda Mlima Kilimanjaro nikikusudia baadaye kuukabili Mlima Meru. Waliopanda milima yote miwili wanasema kuwa, pamoja na kuwa Meru siyo mrefu kuliko Kilimanjaro (Kilimanjaro una urefu wa mita 5,895 juu ya usawa wa bahari), untoa changamoto kali kwa sababu kupanda kwake ni mpando wa siku 2 mfululizo wakati Mlima Kilimanjaro unahusisha njia zinazovuka mabonde kadhaa na hiyo ina maana kuwa wanaoelekea kileleni hujikuta wakipanda na kushuka na hata wakati mwingine kupita sehemu zenye tambarare.

Tafiti zinathibitisha kuwa miaka bilioni kadhaa iliyopita Mlima Meru ulilipuka kutokana na msukumo wa gesi za volkano na kusababisha sehemu yake ya pembeni kumeguka na kutapakaa kwenye eneo la umbali unaofikia upande wa magharibi ya Mlima Kilimanjaro. Hizo tafiti zimethibitisha kuwepo tabaka ya udongo wa Mlima Meru juu ya sehemu hiyo ya Mlima Kilimanjaro.

Picha hii ya chini ambayo imepigwa na vyombo vinavyoruka juu vya shirika la Marekani NASA inaonyesha vizuri sehemu ya Mlima Meru iliyomeguka kutokana na mlipuko wa volkano. Tofauti ya rangi iliyopo kwenye picha inaakisi tofauti ya umbali kutoka usawa wa bahari wa eneo hilo la Mlima Meru.

Hii picha ya Mlima Meru inatumika kwa hisani ya NASA/JPL-Caltech. [Photo: Courtesy NASA/JPL-Caltech]

Tarehe za kupanda Mlima Kilimanjaro mwaka huu ni Septemba 20 hadi 27

Kila mwaka tangu mwaka 2008 nimekuwa napanda Mlima Kilimanjaro kuchangisha pesa za hisani. Mwaka 2008 nilipanda Mlima huo na raia wa Vietnam, Le Hu Dyuong. Mwaka 2009 nilipanda Kilimanjaro na Notburga Maskini, ambaye tulisoma pamoja Shinyanga Commercial Institute (Shycom) miaka iliyopita. Yeye alikuwa pamoja na mtangazaji maarufu wa Clouds FM, Gerald Hando.

Le akiwa kwenye bwawa lenye mamba, baada ya msafara wa kupanda Mlima Kilmanjaro mwaka 2008.

Mwaka jana nilipanda mlima na Jaffar Amin, mtoto wa kiongozi wa zamani wa Uganda, Idi Amin.

Jaffar Amin, akiwa amekaa mbele ya mahema yetu kwenye kambi ya Karanga iliyopo mita 3,963 juu ya usawa wa bahari wakati wa msafar wa mwaka jana wa kupanda Mlima Kilimanjaro.

Mwaka huu natarajia kupanda Mlima Kilimanjaro kuanzia tarehe 20 hadi 27 Septemba. Natarajia kupanda mlima pamoja na wafuatao. Ambao wamesema watajiunga na mimi mwaka huu ni pamoja na mwanablogu mwashuhuri Muhidini Issa Michuzi, mdau wa Utalii Aysha Boma, raia wa Uswisi Andrea Wobmann, mtengeneza filamu wa Marekani Jim Becket (amewahi kuongoza picha ya Mark Dacascos) pamoja na mpigapicha wake, na raia wa Uganda Barbara Allimadi. Kuna wengine ambao bado hawajathibitisha.

Masahihisho kwenye namba ya akaunti ya BUDAP

Nilifanya makosa katika taarifa ya awali niliyotoa juu ya namba ya akaunti ya Budap, mmoja wa walengwa wa The Mwalimu Nyerere/Mt. Kilimanjaro Charity Climb iliyomalizika hivi karibuni mjini Moshi.

Juu ya kilele cha Mlima Kilimanjaro. Kulia unaonekana Mlima Meru.

Taarifa sahihi ni hizi:

Jina la Akaunti:

Budap

Benki:

National Bank of Commerce, Tawi la Bukoba

Namba ya Akaunti:

027201092625

CCM wafungua tawi Uingereza, CHADEMA juu ya Mlima Kilimanjaro

Taarifa zilizonifikia hivi punde zinaeleza kuwa baadhi ya Watanzania waishiyo katika mji wa Luton Uingereza walijumuika 12 Desemba 2010 kwa ajili ya ufunguzi wa tawi jipya katika mji wa Luton, ufunguzi uliyofanyika katika hoteli ya Chiltern UK.

Taarifa hiyo, kwa hisani ya Tawi la CCM Uingereza inaendelea:

Wengi wao wanasema wana imani kubwa na CCM katika kuiongoza Tanzania kwa kuonyesha muelekeo wa kuwa na imani na vijana wasomi wachapakazi waliyoko ndani na nje ya nchi.

Ufunguzi huo ambao uliongozwa na mwenyekiti wa tawi la CCM - UK, Maina Owino, kwa kushirikiana na viongozi wengine wa CCM akiwemo Katibu Mwenezi wa Siasa, Moses Katega. Pia viongozi kutoka mashina ya Reading, Birmingham na sehemu zote za London walijumuika.


Katika hotuba yake fupi Ndugu Maina Owino alitoa changamoto nyingi za mafanikio  yaliyopatikana katika kipindi cha miaka mitano iliyopita chini ya uongozi wa Mwenyekiti wa CCM Taifa na Rais wa Jamhuri ya Muungano wa Tanzania, Mhe. Jakaya Mrisho Kikwete katika nyanja mbalimbali kama madini, elimu, ukusanyaji wa mapato ya serikali, waajiriwa wenye sifa za kukidhi nafasi za uongozi serikalini katika nyanja zote, na ujasiriamali kwa Watanzania wanaojitafutia maendeleo bila bugudha.


Changamoto kuhusu ushiriki wa vijana wasomi hapa Uingereza kuingia katika mchakato wa siasa ndani ya Chama ili kuleta mabadiliko yatakayozidi kukiimarisha Chama kisera na kuzidi kuwaletea Watanzania maendeleo katika nyanja mbalimbali kupambana na umasikini yalitolewa na katibu wa shina jipya la Luton aliyechaguliwa siku hiyo, Ndugu Abraham Sangiwa, na kuungwa mkono na wajumbe wote waliyohudhuria ufunguzi huo.


Viongozi waliochaguliwa ni:


Albert Ntmi - Mwenyekiti
Abraham Sangiwa - Katibu Mkuu
John Mbwete - Mjumbe
Sammy Martin - Mjumbe
Norman Wage - Mjumbe

Wakati huo huo, siku mbili zilizopita, nikielekea kilele cha Mlima Kilimanjaro, katika kambi ya Barafu, ambayo ni kituo cha mwisho kabla ya safari ya kufika kilele cha Uhuru niliona bendera ya CHADEMA ikipepea.

Kwa mujibu wa taarifa nilizopata toka kwa wapagazi wanaosindikiza wageni kupanda Mlima Kilimanjaro wanaojulikana miongoni mwao kama "wagumu", kutokana na kazi ngumu wanayofanya kusindikiza wageni juu ya mlima huu maarufu, shughuli za CHADEMA zimeanza juu ya Mlima Kilimanjaro miaka mitatu iliyopita.

CHADEMA hawana tawi juu ya Mlima Kilimanjaro ila nilichoshuhudia mimi na jitihada za wana-CHADEMA kupeperusha bendera ya chama chao kwenye sehemu iliyo juu kuliko zote Tanzania. Kambi ya Barafu ipo urefu wa mita 4,600 juu ya usawa wa bahari.

Jaffar Amin amewasili Moshi kupanda Mlima Kilimanjaro

Bwana Jaffar Amin amewasili Moshi leo mchana tayari kwa kushiriki nami kupanda Mlima Kilimanjaro kwa madhumuni ya kuchangisha pesa za hisani kwa ajili ya Sekondari ya Wasichana ya Chief Wanzagi ya mkoani Mara, pamoja na kuchangia asasi ya mjini Buoka inayoitwa BUDAP inayojishughulisha na miradi ya kusaidia walemavu kwa njia ya mafunzo na ajira.

Jaffar Amin, pichani, mara baada ya kuwasili Moshi mjini leo mchana, akiwa na hamasa kubwa ya kupambana na Mlima Kilimanjaro ambao unaonekana nyuma yake.

Baada ya kumpokea katika uwanja wa ndege wa kimataifa wa Kilimanjaro, Jaffar alisema amejitayarisha vyema kupanda Mlima Kilimanjaro kuanzia Jumanne, 7 Desemba 2010 kwa muda wa siku nane.

Ni mara yangu ya tatu kupanda huo mlima, na mara ya kwanza kwa Jaffar. Matarajio na maombi kwa wadau mbalimbali ni kuchangia mojawapo ya walengwa wa tukio hili ambalo linajulikana kama The Mwalimu Nyerere/Mt. Kilimanjaro Charity Climb 2010.

Tafadhali changia mojawapo ya hawa wafuatao (au wote):

Jina la Akaunti:

Chief Edward Wanzagi Girls' Secondary School Fundraising

Benki:

National Bank of Commerce, Tawi la Musoma

Namba ya Akaunti:

030201191529

Pamoja na:

Jina la Akaunti:

Budap

Benki:

National Bank of Commerce, Tawi la Bukoba

Namba ya Akaunti:

027201092625

##################################