Umuhimu wa wagombea huru sasa umejidhihirisha

Hii ni makala yangu ya tarehe 11 Agosti 2015 kwenye safu yangu inayoitwa Ujumbe toka Muhunda ndani ya gazeti la Jamhuri linalochapishwa kila Jumanne.

******************************************

Kama unahitajika ushahidi kuwa upo umuhimu wa kuruhusiwa kwa wagombea huru ndani ya Katiba ya Tanzania, basi huo ushahidi umejitokeza baada ya matukio ya hii karibuni yaliyomo ndani ya siasa za Tanzania.

Tukio lililohitimisha ukweli huo ni kuhama kwa Waziri Mkuu mstaafu Edward Lowassa kutoka Chama cha Mapinduzi (CCM) na kujiunga na Chama cha Demokrasia na Maendeleo (CHADEMA). Kwa maelezo yake, amehama kutoka CCM kwenda CHADEMA kwa sababu “…mchakato wa kuteua wagombea uligubikwa na mizengwe, ukiukwaji wa maadili, uvunjifu wa Katiba, na taratibu za uchaguzi ndani ya CCM.”

Aliendelea kusema: “Zaidi ya hayo uchaguzi ulisimamiwa kwa upendeleo zaidi na chuki iliyokithiri dhidi yangu.” Kilichotokea Dodoma, kwa mujibu wa maelezo yake, ni kubaka Demokrasia.

Amehamia CHADEMA akiamini kuwa yale yaliyomkuta ndani ya CCM hayawezi kutokea ndani ya CHADEMA. Na dalili ni nzuri kwake mpaka sasa kwa sababu CHADEMA hawakuchukua muda mrefu na walimpa nafasi ya kugombea urais kwenye uchaguzi mkuu wa mwaka huu, nafasi ambayo CCM haikumpa. Hatimaye amepitishwa kuwa ni mgombea urais wa muungano wa vyama vya siasa vinavyojulikana kama UKAWA.

Mwalimu Nyerere amenukuliwa na Lowassa akitamka kuwa Chama cha Mapinduzi siyo baba yake [Mzee Nyerere Burito], wala mama yake [Mugaya wa Nyang’ombe] na kuwa akikosa mabadiliko ndani ya chama hicho, basi atayatafuta nje ya chama hicho. Mheshimiwa Lowassa amekosa mabadiliko ndani ya CCM na anaamini atayapata ndani ya CHADEMA na UKAWA. Swali ambalo halijaulizwa ni hili: asiyeona mabadiliko ndani na nje ya CCM anakuwa mtoto wa nani?

Kwangu mimi haipo sababu ya msingi ya kuwepo yatima wa kisiasa nchini. Jawabu ni kuwepo kwa mfumo wa kikatiba unaoruhusu wagombea huru kama nguzo ya tatu kwenye siasa. Wagombea huru watatoa fursa kwa wanachama waliokosa macho ya kuona na masikio ya kusikia fursa za mabadiliko zilizomo ndani ya chama tawala na ndani ya vyama vya upinzani kutafuta mabadiliko hayo kwingineko kama wagombea huru, au kama watetezi wa wagombea huru.

Kuna mengi ambayo mtu anaweza kuunga mkono ndani ya sera za vyama tofauti vya siasa, lakini akawa pia hakubaliani na kipengele cha sera kwenye vyama hivyo hivyo. Aidha, kuna maamuzi ambayo yanaweza kupitishwa na chama anachokiunga mkono ambayo hayaafiki. Mtu wa aina hii anapaswa kupewa fursa ya kikatiba ya kupenyeza mawazo yake bila kulazimika kuchukua uamuzi ambao tunaousikia kwa baadhi ya watu wa kustaafu siasa au kuachia wadhifa wake ndani ya chama cha siasa, kwa sababu tu haoni chama ambacho kinawakilisha matakwa yake kwa wakati huo.

Kinadharia, chama kinachotawala au chama cha upinzani kinachobaini hali hiyo kitatambua ukomo wa kile ambacho mimi naita jeuri ya chama, au uhakika wa chama cha siasa kuwa kile kinachoidhinishwa na maamuzi rasmi au yasiyo rasmi ya chama ndiyo mwisho wa mjadala na kufungwa kwa kikao. Mfumo wa wagombea huru unaweza kuwa kama sehemu ya mwisho ya kukata rufaa kwa wananchi kwa sababu hiyo ya uwepo wa kukinzana kwa mitazamo baina ya mtu na mienendo ya chama alichokiunga mkono.

Woga mkubwa wa washiriki wa siasa za siku hizi ni kushindwa uchaguzi, siyo kung’ang'ania misimamo ambayo nyakati hizi inaitwa imepitwa na wakati.

Kwenye nadharia ya siasa chama cha siasa kinapaswa kuwa tayari kushindwa kwenye uchaguzi kwa sababu ya kushikilia misimamo mbalimbali ambayo kimekuwa kikiunga mkono kwa mujibu wa sera zake. Kwenye miaka ya mwanzo baada ya Tanganyika kupata uhuru, Mwalimu Nyerere, akiwa Waziri mkuu wa wakati ule, alipingana na baadhi ya wawakilishi wa chama cha TANU bungeni na wa serikali yake, ambao wakati wa kujadili muswada wa uraia wa Tanganyika walidai kuwa uraia wa Tanganyika uwe haki ya Watanganyika wenye ngozi nyeusi tu. Katika kupinga msimamo wa wenzake na akiwa anatetea hoja kuwa kila Mtanganyika anayo haki ya kuwa raia bila kubaguliwa kwa rangi ya ngozi yake, Mwalimu Nyerere alisema kuwa serikali yake itakuwa tayari kushindwa kwenye kura bungeni na kuondoshwa madarakani lakini haiwezi kukiuka misingi ya haki na usawa ambayo yenyewe iliipigania na kuitetea.

Leo hii ndani ya siasa tunashuhudia kuwa misimamo ni kama mashati ambayo hubadilishwa kwa mujibu wa mahitaji yanayojitokeza.

Kwa mtazamo wangu, vyama vyote siasa vinaweka mikakati ya kufika Ikulu tu, kwa kushinda uchaguzi mkuu ujao. Kwa CCM ni kupigana kufa na kupona kuhakikisha kuwa Edward Lowassa hawi rais wa tano wa Tanzania.

Kwa UKAWA hali hii ni dhahiri kuliko kwa CCM. Hatutarajii kuwa jambo rahisi kwa vyama vinne vya siasa kukubaliana kwa yote yaliyomo kwenye sera zao. Kwao jambo la msingi itakuwa “Rais wetu akishaapishwa tutajua la kufanya.”

Ukweli haupingiki kuwa lipo pengo ndani ya siasa ambalo linalazimisha sehemu fulani ya wapiga kura ya Watanzania kuwepo kwenye siasa za vyama ambazo haziwakilishi kikamilifu matakwa yao. Suluhisho ni wagombea huru. Wagombea huru hawatamaliza hitilafu zilizopo lakini watazipunguza kwa kiasi kikubwa.

Taarifa nyingine kama hii:
https://muhunda.blogspot.com/2017/07/afrika-tunaibiwa-sana-tena-sana.html

Bila Karume hakuna Tanzania

Bila yeye hakuna Tanzania. Ni maneno ambayo Mwalimu Nyerere aliyatamka akizungumiza juu ya masuala mbalimbali, pamoja na chimbuko la muungano wa Tanganyika na Zanzibar.

Nachapisha tena makala iliyochapishwa tarehe 26 Aprili 2016 kwenye safu yangu "Ujumbe toka Muhunda" ndani ya gazeti la Jamhuri. Katika makala hiyo narudia ukweli ambao unasahauliwa, ya kuwa wazo la muungano ni wazo la Sheikh Abedi Amani Karume. Leo ni kumbukumbu ya siku ya kuuwawa kwake.

********************************

Muungano ni pendekezo la Sheikh Karume

Na G. Madaraka Nyerere

Muungano wa Tanganyika na Zanzibar leo unatimiza miaka 52. Kwa binadamu miaka 52 siyo haba, na aliyoitimiza tunamuita mzee. Kudumu kwa muda mrefu kiasi hiki kunapaswa kupongezwa, ingawa si wakati wote wanaostahili pongezi wanaipata.

Tarehe ya leo, miaka 52 iliyopita, Mwalimu Julius Nyerere na Sheikh Abeid Amani Karume, waliweka sahihi hati ya kuunganisha Tanganyika na Zanzibar. Lakini wengi wanapoandika au kuzungumzia Muungano huweka msisitizo wa mchango wa Mwalimu Nyerere na imani yake kubwa juu ya umuhimu wa kuungana. Kwa maoni yangu, Sheikh Karume hapati sifa anayostahili kama muasisi wa Tanzania.

Kwenye mahojiano ndani ya filamu iliyoandaliwa na M-Net, Mzee Rashidi Kawawa alifafanua kuwa wazo la kuunganisha Tanganyika na Zanzibar lilitolewa na Mzee Karume, halikuwa wazo la Mwalimu Nyerere. Ni kweli kuwa Mzee Karume alitoa wazo kwa mtu ambaye tayari alikuwa anaamini juu ya umuhimu wa umoja, na bila shaka ndiyo sababu ya kukubaliwa.

Naye Mama Maria Nyerere amesimulia kuwepo Ikulu Dar es salaam siku Karume alipotoa wazo hilo. Mzee Karume alikuwa Dar kwa shughuli za kikazi, na ni katika mazungumzo na Mwalimu baada ya mazungumzo yake rasmi ya kikazi ndipo mazungumzo ya muungano yalianza. Mwalimu alianza kulalamika juu ya kasi ndogo ya mchakato wa kuunganisha nchi tatu za Afrika Mashariki ili kuunda shirikisho. Hapo hapo Karume alimwambia Mwalimu kuwa kama mchakato huo unachelewa, basi yeye yuko tayari Zanzibar iungane na Tanganyika. Na kuongeza: “Wewe utakuwa rais, mimi nitakuwa makamu wako.”

Wazo la kujenga umoja halikuwa geni kwa Mwalimu Nyerere, kwa hiyo haihitaji utafiti wa kina kubaini sababu ya kulikubali mara moja na kulivalia njuga wazo la Mzee Karume. Agenda ya kuleta umoja wa nchi za bara la Afrika ilikuwa ni mojawapo ya mikakati ya chama cha TANU wakati wa harakati za kutafuta uhuru wa Tanganyika.

 Kwa namna fulani, Mzee Karume ni kama alikuwa anamwambia Mwalimu Nyerere kuwa hiyo safari ya umoja tuianze kwa hatua hii ndogo baina ya Tanganyika na Zanzibar, hizo hatua kubwa zitafuata.

Wataalamu wengi wa kikatiba wamekosoa taratibu zilizofuata kukamilisha wazo la Mzee Karume mpaka kufikia kuwekwa sahihi hati ya Muungano kati yake na Mwalimu Nyerere tarehe 26 Aprili 1964. Na hapa lawama kubwa inamuangukia mpokea wazo, Mwalimu Nyerere.

Pamoja na kwamba ziko hoja nzuri za kukosoa mchakato wenyewe, zipo pia hoja kinzani ambazo hazikubali kuwa Muungano ni batili. Malumbano haya, miaka 52 baadaye, bado yanaendelea. Lakini yasituyumbishe tukasahau kuwa ni Mzee Karume ndiyo alianzisha hoja ya muungano.

Zipo taratibu za kugeuza simulizi za wazee kuwa historia rasmi, na pengine wakati umefika sasa wa wanahistoria kufanyia utafiti kipengele hiki cha historia ambacho hakipewi uzito unaostahili.

Kuna wakati baadhi ya wasomi wetu, katika kutafuta sababu zinazowaridhisha wao juu ya historia ya Muungano, walisisitiza kuwa wazo la Muungano liliibuliwa na afisa mmoja wa shirika la ujasusi la Marekani, CIA. Kwa mawazo yao sisi hatuna uwezo wa kufikiri kuwa Muungano ni muhimu kwetu, tunahitaji Wamarekani kutufundisha. Miaka hiyo ya sitini, kila tukio liliwekwa kwenye mizani ya vita kati ya itikadi za nchi za magharibi zikiongozwa na Marekani, na itikadi za nchi za mashariki zikiongozwa na Urusi.

Kama siyo imani ya kuona kuwa kila jema na lenye manufaa hutoka nje tu, basi inakuwa ni jitihada pia ya kupuuza mchango wa viongozi wetu katika kujenga na kuimarisha Muungano kwa kushawishi kuwa mawazo yao yalipandikizwa na wale ambao tunaamini hawana nia njema bali wanalinda masilahi yao.

Bahati nzuri, kama vile alifahamu mapema kuwa haya maneno yatasemwa Mwalimu Nyerere aliwajibu mapema watu hawa. Katika chapisho la chama cha TANU la Juni 1960 lililosisitiza haja ya kuwepo kwa shirikisho la Afrika Mashariki, Mwalimu aliweka msimamo wake na wa TANU juu ya shirikisho kwa kusema (siyo tafsiri rasmi):

“Katika watu wanaounga shirikisho watapatikana watu ambao wanasukumwa na sababu tofauti….watakuwepo wafanyabiashara…kutakuwa na kila aina ya watu upande wa shirikisho na watakuwa na kila sababu. Lakini hoja ya shirikisho inajitosheleza kwa uhalali wake yenyewe. Thamani ya almasi haitegemei tabia ya wale wanaoichimba. Madini ni almasi, au siyo almasi. Iwapo shetani mwenyewe atajitokeza na kuunga mkono huu mpango wa shirikisho, ujio wake hautabadilisha mawazo yangu juu ya shirikisho au juu ya shetani mwenyewe.”

Mawazo ya Sheikh Abeid Amani Karume ya kuunganisha Zanzibar na Tanganyika yalitua kwa muumini mkubwa wa umoja wa watu, na hasa umoja wa nchi za Afrika, Mwalimu Nyerere. Lakini tukubali kuwa bila Mzee Karume upo uwezekano kuwa hadi sasa tungekuwa hatuna Tanzania.

Miaka 52 baadaye, kwenye mazingira ya vijana wetu kutumia muda wao mwingi kutumiana ujumbe kwenye Twitter, Facebook, na Instagram kuliko kufukua yaliyojichimbia kwenye vitabu pamoja na kutafiti yale ambayo hayapendi kusemwa, ipo hatari kuwa yale ya CIA yataendelea kuwekewa uzito zaidi kuliko yale ambayo hayakidhi malengo ya mada za wasomi.

Taarifa nyingine inayohusiana na hii:

http://muhunda.blogspot.com/2010/04/kumbukumbu-ya-karume.html

Ushauri kwa wanaopiga kura kwa mara ya kwanza

Nimepiga kura kwa mara ya kwanza mwaka 1985. Ningeweza kupiga kura mwaka 1980 lakini sikuwa nchini wakati huo, nilikuwa masomoni. Naamini kuna vijana wengi ambao watakuwa wanapiga kura kwa mara ya kwanza mwaka huu na naomba nitoe ushauri mdogo kwao.

Nikiwa na Mwalimu wangu, Godian Muikza (kushoto) ambaye ni diwani anayemaliza muda wake wa Kata ya Ikondo, Wilaya ya Muleba Kusini.

Kwanza lipo suala muhimu la kuchambua ahadi. Kwenye uchaguzi mkuu wa mwaka 1985 nilimpa kura ya urais Alhaji Ali Hassan Mwinyi na ya ubunge nilimpa Kapteni Ukiwaona Ditopile Ramadhani Mwinshehe Mzuzuri. Siku zile sikuwahi kuhudhuria mkutano wowote wa kampeni za uchaguzi kwa hiyo kura yangu ya ubunge sikupiga kutumia kigezo kikubwa zaidi ya kufurahishwa na jina la mgombea. Sikumbuki hata alikuwa anagombea nafasi ile dhidi ya nani, lakini nakumbuka ilikuwa wanawania nafasi ya ubunge wa jimbo la Ilala. Mgombea urais, Mzee Mwinyi, alikuwa ana fursa ya kusikika zaidi ya wagombea ubunge kwenye vyombo vya habari kwa hiyo yeye tulimsikia zaidi ya wagombea ubunge.

Hata mwaka huu naamini kuna wapiga kura wengi watajitokeza wa aina yangu, kama nilivyokuwa mimi mwaka 1985 na kupiga kura kwa kufurahishwa na jina la mtu tu bila hata kuchambua kwa makini sera anazowakilisha mgombea huyo. Mwaka 1985 hatukuwa na vyama vingi, lakini sasa vipo. Kwa hiyo, hakuna sababu ya msingi ya mpiga kura yoyote kuacha kuweka sera za vyama kwenye mizania na kuamua chama kipi kitapata kura yake. Hatuna uhakika kuwa yanayoahidiwa yatatekelezwa, lakini bado ni muhimu kuchambua sera tofauti. Akishinda mtu wako na asipotekeleza ilani yake angalau unayo sehemu ya kuanzia kumhoji. Kama ulimchagua kwa mkumbo tu hutakuwa na kigezo cha kuamua kuwa hajatimiza ahadi zake.

Wapiga kura wa Butiama wakipiga kura kwenye uchaguzi mkuu wa mwaka 2010

Pili, nazungumzia wale ambao wana uhakika mkubwa wa matokeo ya ushindi kwa wanaowaunga mkono, ikiwa ni vyama vya siasa au mgombea mmoja mmoja. Kusikiliza na kuamini na kauli kama “ushindi ni lazima” ni mwanzo wa kukaribisha vurugu. Kama kiongozi anatumia kauli hiyo kuhamasisha tu wafuasi wake ili waweke juhudi kubwa kwenye kampeni inaweza kuwa haina madhara. Lakini kauli hiyo inaweza kufasiriwa kuwa “tumeshashinda hata kabla ya kupiga kura na mtu yoyote atakayesema kuwa hatujashinda ni muongo na ametuibia kura.” Hapo tunakaribisha vurugu.

Mwaka 2010 niliteuliwa wakala wa mgombea ubunge na nilijifunza kitu kimoja cha msingi. Kama wakala wa mgombea yuko makini, siyo rahisi kuibiwa kura. Sikulala siku hiyo mpaka matokeo yalipothibitishwa na msimamizi wa uchaguzi alfajiri ya siku iliyofuata. Wanaoibiwa kura ni wale ambao wameweka mawakala ambao siyo waaminifu au ambao hawakuwa makini. Mtu akitaka kuibiwa, ataibiwa.

Kulia ni Mhe. Vincent Nyeerere, Mbunge wa Musoma Vijijini kupita Chama cha Maendeleo na Demokrasia (CHADEMA) anayemaliza kipindi chake cha ubunge aliyeniteua kusimamia kura zake kwenye uchaguzi mkuu wa mwaka 2010. Kushoto ni aliyekuwa Mkuu wa Wilaya ya Musoma, Kapteni Godfrey Ngatuni.

Tangu kuanzishwa mfumo wa vyama vingi tumesikia shutuma kuwa Chama cha Mapinduzi (CCM) ndiyo wataalamu wa kuiba kura. Kama hizo shutuma ni za kweli, sioni sababu yoyote ya kutoana roho kwa sababu sasa hivi Mhe. Edward Lowassa amehamia upande wa pili. Yeye amekulia na kujifunza siasa ndani ya CCM na, kwa vyovyote vile, atakuwa amehama na uelewa uliobobea wa mbinu zinazotumika kuiba kura na atakuwa anafahamu mbinu za kutumika kuzuwia wizi huo. Mwizi hawezi kumuibia mwizi.

Mwanachama wa Chama cha wananchi (CUF) akielekea kwenye mkutano wa kampeni jijini Mwanza mwaka 2010.

Kwa sababu hii sioni kabisa busara ya mtu yoyote kutamka kuwa kaibiwa kura kama yeye mwenyewe hataki kuibiwa kura. Labda atumie kauli hiyo kama kisingizio cha kupinga matokeo. Tunao wajibu wa kujenga mazingira yenye kulinda amani, lakini tunao pia uwezo wa kuweka mazingira yanayobomoa amani.

Uchaguzi huu umeibua ushindani mkubwa kati ya CCM na vyama vinavyowakilishwa na UKAWA. Kwa bahati mbaya, ushindani unaonyesha dalili za uhasama na muelekeo kuwa kipindi hiki cha kampeni kitaibua matukio ya kuvunjika kwa amani. Lakini amani itavunjika tu iwapo wapiga kura tutakubali ivunjike. Na amani inapovunjika hutasikia hata siku moja kuwa Mhe. John Magufuli au Mhe. Edward Lowassa kavunjika mguu kwa sababu ya vurugu za kisiasa.

Bado sijaona sababu ya msingi ya kuvunjika kwa amani kutokana na uchaguzi. Usikubali kuwa chanzo cha kuvunjika kwa amani.

Mada yangu ya leo: Hii siyo siasa

Tuawasikia baadhi ya viongozi waandamizi wa Chama cha Mapinduzi (CCM) wakimtaka mgombea urais wa UKAWA akubali wakutane kwenye mdahalo ili waeleze maovu yake. Yeye anasema kama wana ushahidi kuhusu maovu yake waende mahakamani. Hii siyo siasa.

Nionavyo mimi, siasa ingekuwa hivi:

1. Kama una tuhuma dhidi ya mgombea urais husubiri awe rais kwanza. Unasema yale unayoyafahamu. Akisha kuwa rais halafu utafanya nini? Utaomba mdahalo?

2. Mpiga kura ana haki ya kufahamu taarifa zote muhimu juu ya wagombea kabla hajafikia uamuzi wa kumchagua yule ambaye anaona anafaa. Kuamua kuwa taarifa hizo ni kama mali adimu haina tofauti na kujifanya mtaalamu wa bishara (au taaluma nyingine) ambaye ametumia muda mwingi kupata elimu na uzoefu kwenye taaluma yake halafu anaamua, kwa haki kabisa, kuwa taarifa hizo hazitoki mpaka kwa masharti yanayomnufaisha yeye, au kwa pesa au kwa njia nyingine atakayoamua. Ni wajibu wa kiongozi yoyote makini kumpa mpiga kura taarifa sahihi, hasa wakati wa uchaguzi.

3. Mpaka sasa, tumemsikia mtuhumiwa akisema kuwa hana tuhuma yoyote na, kwa mantiki hiyo, anaposema nendeni mahakamani ni sawa kabisa. Wale wenye taarifa hizo wakaziibue mahakamani. Watuhumiwa wachache sana hukubali kosa nje ya mahakama.

Kwa hayo machache, sisemi kuwa tuhuma ni za uongo.

Ninachoona ni kundi moja ambalo limekosa ujasiri wa kutamka wanalotaka kutamka na badala yake kuwafanya wapiga kura kubaki wanabishana wenyewe kwa wenyewe na ujinga wao* (kama ujinga huo upo kweli) bila kuwapa taarifa ambazo zinaweza kuwasaidia kufanya chaguo sahihi.

Kama huo ujasiri unakosekana, basi ni bora kunyamaza tu. Kuwafanya wapiga kura kuwa wajinga mara ya pili ni hatari kisiasa.

Huo ndiyo ujumbe wango leo hii.

*Wale ambao mtakimbilia kwenye Tume ya Mawasiliano kunilalamikia kuhusu kutumia neno "ujinga" ni kwamba siyo tusi, ni hali ya kutofahamu tu.

Mdahalo wa uchaguzi

Kwenye mchakato huu, dozi ya politiki ilizidi kiwango

Nafikiri ni General Defao aliyeimba: "umekalia politiki tu, kazi hufanyi". Katika kipindi ambacho Chama cha Mapinduzi (CCM) kimekuwa kikiendelea na mchakato wa kupata mgombea urais kwenye uchaguzi mkuu mwaka huu, hali hiyo ya kukalia politiki tu imekuwa kweli kwa watu wengi.

Wengi tunatambua umuhimu wa mchakato wowote wa kisiasa kama jambo muhimu katika jamii na jambo la msingi ni kupata viongozi wanaosimama kuwakilisha matakwa ya wengi. Na bila shaka ni suala ambalo kila mmoja wetu anapaswa kulifuatilia kwa karibu sana.

Lakini mchakato huo unapotufanya tuache kila kitu, hata zile kazi ambazo zinatulipa ajira, basi suala la siasa linakuwa limezidi dozi ya kawaida. Kuna watu wengi tu ambao hawakuwa na nafasi yoyote katika vikao vya maamuzi vya CCM vilivyokaa Dodoma kumpitisha John Magufuli ambao walienda Dodoma kufuatilia mchakato huo.

Baadhi ya ambao hatukuwa Dodoma tulikaa muda wote tukisikiliza taarifa kwenye vyombo vya habari kufuatilia mchakato. Wengine wengi walitumia muda wao kujibishana na wenzao kwenye mitandao ya jamii. Dozi haikuwa ndogo hata kidogo.

Baadhi ya watia nia waliofikia hatua za mwisho za mchakato wa kupata mgombea urais wa CCM

Naamini watafiti wanaweza kubaini kushukua kwa uzalishaji katika kipindi cha majuma kadhaa yaliyopita.

Tushukuru kuwa mchakato huu wa CCM umeisha na labda watu watarejea kwenye maisha yao na majukumu yao ya kila siku.

Mahojiano yangu kuhusu wagombea urais

Majuma kadhaa yaliyopita nilihojiwa na mwandishi wa habari wa Mwanza kuhusu maoni yangu juu ya wagombea urais waliojitokeza kuwania nafasi ya urais kwenye uchaguzi mkuu mwaka huu.

Sehemu ya mahojiano hayo imechapishwa hapa.

Mwisho wa kampeni Butiama za uchaguzi wa serikali za mitaa

Viongozi na wagombea wa Chama cha Mapinduzi wa kijijini Butiama wakiomba kura mbele ya wakazi wa Butiama siku moja kabla ya uchaguzi wa serikali za mitaa utakaofanyika nchini kote kesho tarehe 14 Desemba 2014.

Mkutano huu (picha ya juu) ulifanyika eneo la stendi, Butiama. Wapinzani wao wa Chama cha Demokrasia na Maendeleo (CHADEMA) walifanya mkutano wa mwisho wa kampeni kwenye kitongoji cha Mtuzu, Butiama.

Enzi za Mwalimu

Baada ya kutangazwa Azimio la Arusha, mwaka 1967, baadhi ya makundi ya Watanzania kutoka maeneo mbalimbali ya Tanzania yalianza kutembea kwa mguu kutoka sehemu moja hadi nyingine ya nchi kuunga mkono Azimio la Arusha.

Picha ya Idara ya Habari Maelezo

Kwenye picha ni vijana kutoka mkoa wa Mara ambao walitembea hadi Dar es Salaam kuunga mkono sera ambayo iliweka umuhimu kwa serikali kumiliki njia kuu za uchumi na kutumia rasilimali ya Taifa kwa manufaa ya wananchi.

Ikulu, Dar es Salaam, walipokelewa na Rais Mwalimu Julius Kambarage Nyerere.

Kazi ya siasa ni chaguo la mwisho kwa mwanafunzi wa shule ya msingi Ramadhani Alfonsi

Mwanafunzi wa shule ya msingi Ramadhani Alfonsi anakusudia kusomea udaktari au urubani. Lakini asipofanikiwa azma ya kufanya mojawapo ya kazi hizo mbili basi ataingia kwenye siasa.

Nimesikia leo mahojiano yake kwenye redio ya TBC FM na ni chaguo ambalo linaibua maswali. Miaka mingi iliyopita nilitembelea shule moja ya sekondari iliyopo Mufindi, Iringa, na mwanafunzi mmoja alipoulizwa angependa kufanya kazi ipi atakapokuwa mtu mzima alisema anataka kuwa mbunge.

Leo hii mwanafunzi Ramadhani anachagua udaktari kwanza, siasa mwisho. Iwapo wanafunzi wengi zaidi sasa wanachagua kazi nyingine kama chaguo la kwanza badala ya kuingia kwenye siasa basi kwa maoni yangu haya ni maendeleo.

Uongozi na siasa vyote vina umuhimu wake lakini naamini kuwa taaluma kama udaktari na taaluma nyingine za ufundi zinaleta manufaa makubwa zaidi kwa jamii kuliko siasa. Kwa mazingira ya sasa kila mtu anaweza kuwa mwanasiasa lakini siyo kila mtu anaweza kuwa daktari, rubani, au mhandisi.

Taarifa nyingine zinazohusiana na hii:
http://muhunda.blogspot.com/2011/07/siasa-ya-tanzania-chama-na-sera-zake-au.html
http://muhunda.blogspot.com/2011/04/mwalimu-wangu-gordian-mukiza.html

Nkrumah bado anakumbukwa

Mwaka 2008 mimi na baadhi ya wadau kutoka nchi wanachama za Jumuia ya Maendeleo ya Kusini mwa Afrika (SADC) tulialikwa nchini Zimbabwe kuandika kuhusu uchaguzi mkuu wa nchi hiyo.

Baada ya kura kupigwa tulitembelea kituo kikuu cha kutoa taarifa za uchaguzi cha Tume ya Uchaguzi ya Zimbabwe (ZEC) jijini Harare ili kupokea taarifa zilizoendelea kufika hapo toka sehemu mbalimbali za Zimbabwe.

Maafisa wa Tume ya Uchaguzi wa Zimbabwe wakitangaza matokeo ya uchaguzi wa Zimbabwe.

Wadau ambao walikuwa waandishi wa habari walikuwa ni pamoja na Bayano Valy kutoka  Msumbiji (aliyesimama, kushoto), na Penny Kamanga (aliyesimama, kulia) kutoka Malawi.

Nimewahi kuandika kwenye blogu yangu ya Kiingereza kuhusu tofauti za kimtazamo kati ya Dk. Kwame Nkrumah, na Mwalimu Julius Nyerere. Kwenye picha ya hapo juu, nukuu iliyopo kwenye fulana aliyovaa huyo mwanahabari aliyekaa kulia inatanabahisha kufanana kwa baadhi ya mitazamo yao. Tafsiri ya nukuu:

Uhuru wa Ghana hauna maana iwapo hautahusishwa na ukombozi kamili wa Afrika.

Ni msimamo ambao Mwalimu Nyerere naye alikuwa nao. Wakati wa uongozi wake, Tanzania ilitoa msaada mkubwa wa hali na mali kuunga mkono vyama vya ukombozi kutoka nchi za Kiafrika ambazo zilibaki chini ya utawala wa kikoloni na kibaguzi, ikiwa ni pamoja na Msumbiji, Zimbabwe, Afrika Kusini, na Namibia.

Sijiuzulu ng'o! Hata mkija na winchi ya bandari

Jenerali David Petraeus wa Marekani amejiuzulu hivi karibuni kwa sababu ya mahusiano na mwanadada ambaye jina lake haliko kwenye cheti cha ndoa cha Jenerali huyo. Kwa Kiswahili anaitwa nyumba ndogo; kwa Kizanaki anajulikana kama kitungo.

Haya yangetokea Tanzania hamna mtu yoyote angeachia ngazi, na suala hili linaibua mitazamo tofauti kati ya utumishi wa umma hapa Tanzania na utumishi wa umma katika nchi nyingine.

Ukweli ni kuwa hata katika mijadala niliyoisikia kwenye vyombo vya habari vya nje kuna wale ambao wanaona kuwa Jenerali Petraeus hakustahili kung'atuka kwa sababu haya ni mambo ambayo yanatokea kwa watumishi wa ngazi za juu kwenye nchi mbalimbali duniani. Mtakumbuka kuwa Rais mstaafu Bill Clinton naye alikutwa na masuala yanayofanana na haya, na aliwekwa kiti moto kwa muda mrefu lakini hakujitoa kwenye uongozi. Tuhuma kubwa dhidi yake ilikuwa kusema uongo baada ya kula kiapo.

Kwa mantiki hiyo, inaelekea wadhifa wa Jenerali Petraeus kama Mkurugenzi wa shirika la ujasusi la Marekani, Central Intelligence Agency, ni nyeti zaidi katika nafasi ya uongozi wa nchini Marekani kuliko hata ule wa Rais wa Marekani, na inasemekana kuwa mkuu wa kazi wa Jenerali Petraeus ndiye aliyemshauri kuachia ngazi na yeye akafuata ushauri huo.

Nimetafakari suala hili iwapo aliyehusishwa na mahusiano haya angekuwa Mkuu wa Usalama wa nchi tofauti na Marekani na iwapo mkuu huyo angekuwa ni Mzanaki.

Soma mahojiano haya ya kubuni:

Mwandishi: Ndugu Madaraka, ninayo taarifa kuwa unahusishwa na tuhuma kuwa una uhusiano wa nje ya ndoa na [jina limehifadhiwa na gazeti] na...

Madaraka: Ndugu? Nani ndugu yako? Bwana mdogo, mimi ni mheshimiwa, tena mheshimiwa sana na ukitaka nijibu maswali yako nataka unipe heshima yangu. Na inaandikwa "m-h-e-" kabla ya jina...

Mwandishi: Samahani, mheshimiwa, nilikuwa nauliza....

Mhe. Madaraka: Swali nimelisikia. Bwana mdogo, nyie wasomi wa siku hizi mnafahamu sana mila na tamaduni za Ulaya na Marekani, lakini cha ajabu mnashindwa kudumisha na kuheshimu mila na tamaduni zenu wenyewe. Na ndiyo maana siku zote mtaendelea kutawaliwa kimawazo. Na ukishatawaliwa kimawazo utapangiwa mpaka maneno ya kuongea na mkeo nyumbani.

Sasa ngoja nikupe somo la bure kuhusu mila na tamaduni za kabila langu. Huyo mama ambaye wewe unashindwa kutaja jina lake, jina lake halisi ni [jina tumelihifadhi] na wala siyo siri kuwa ni mke wangu...

Mwandishi: Atakuwaje mke wako wakati tunafahamu mke wako ni......

Mhe. Madaraka: Mura! Enye ndakuburra ni mkane, bhono ni wazo? [Kijana! Mimi nakwambia ni mke wangu, sasa ni wako?] Bwana mdogo, ukitaka nikujibu usiniingilie ninapokujibu. Ukitaka kunipangia idadi ya kina mama zangu kwa sababu ulisomea Marekani, nashauri umuulize haya maswali Petraeus. Hapa siyo Marekani. Wao wana mila zao na mimi najaribu kukueleza mila zangu, kama utanisikiliza. Hutaki, kafanye kazi Marekani kwa sababu mimi hapa hatutaelewana.

Huyo nyie mnayemwita nyumba ndogo kijijini kwangu ana heshima yake, na wala hafichwi. Tunamuita kitungo, kama umeshawahi kusikia. Na kama ulifikiri utanitoa upepo kwa kunipa hofu kuwa umekalia siri ambayo utaifichua na kuniaibisha utakuwa unapoteza muda. Kwa taarifa yako ndugu zangu wote wanamfahamu, pamoja na mke wangu. Na hii ni pamoja na mamlaka iliyoniteua.

Haya, una lingine?

Mwandishi: Sawa mheshimiwa. Sasa pamoja na kwamba hizo ndiyo mila za Kizanaki, lakini wewe ni mtumishi wa Serikali na unashika wadhifa unaohusiana na usalama na maslahi ya Taifa. Utakuwa unafahamu kuwa nchi hii haiendeshwi kwa taratibu za kabila la Kizanaki. Inafuata kanuni, taratibu, na sheria. Huoni kama kwa kuwa na mahusiano haya yasiyo rasmi unaweza kuwa unahatarisha kuvujisha siri za nchi na kuwa unastahili kujiuzulu.

Mhe. Madaraka: Hivi wewe una akili timamu? Huyo aliyeniteuwa hana akili? Mimi mwenyewe sina akili? Kwamba nitaleweshwa na mahusiano yangu binafsi halafu nianze kuzianika siri za Serikali? Mbona hamkuwa na wasiwasi kuwa nitatoa siri kwa mke wangu, iweje leo nizitoe kwa huyu bi mdogo? Kama tatizo ni mahusiano na kina mama basi hizi kazi wawe wanafanya mapadri, watu ambao hawafungi ndoa. Lakini ni jambo ambalo pia mtalipinga, mtasema hatuwezi kuchanganya dini na Serikali maana hamksoi cha kusema nyie.

Unafahamu ile winchi ya badnari inayobeba kontena la futi 40? Nakwambia hata mkiileta ile kujaribu kuniondoa hapa, sitang'oka

Uchaguzi nafasi 10 za wajumbe wa NEC - CCM Tanzania Bara, Wassira aongoza

Matokeo ya chaguzi za nafasi 10 za wajumbe wa NEC Tanzania Bara wa Chama cha Mapinduzi zinazoendela Dodoma yametoka. Matokeo haya hapa:

1.  Stephen Wassira                  - 2,135
2.  January Makamba               - 2,093
3.  Mwigulu Nchemba             - 1,967
4.  Martine Shigela                  - 1,824
5.  William Lukuvi                  - 1,805
6.  Bernard Membe                 - 1,455
7.  Mathayo David Mathayo   - 1,414
8.  Jackson Msome                  - 1,207
9.  Wilson Mukama                 - 1,174
10. Fenela Mukangara            -     984

Waziri Bernard Membe naye atabiri hali ngumu kwa Chama cha Mapinduzi

Nimewahi kuandika hapa kuwa majaliwa ya Chama cha Mapinduzi kuelekea kwenye uchaguzi mkuu wa 2015 hayaonekani kuwa mazuri kutokana na mambo kadhaa, ikiwa ni pamoja na:

1. kuongezeka kwa nguvu ya kisiasa ya Chama cha Demokrasia na Maendeleo (CHADEMA)
2. kuendelea kupoteza majimbo ya uchaguzi, ikiwa ni pamoja na jimbo la Arumeru hivi karibuni
3. kuachana na misingi iliyokitambulisha Chama cha Mapinduzi kama mwakilishi wa maslahi ya Watanzania wanyonge, wakulima na wafanyakazi.

Habari kamili ziko hapa:

http://muhunda.blogspot.com/2012/04/chama-cha-mapinduzi-ukingoni.html

Sasa, Waziri wa Mambo ya Nje na Ushirikiano wa Kimataifa, Bernard Membe, naye anatabiri hali mbaya kwa CCM. Habari zake kamili hizi hapa:

http://swahilivilla.blogspot.com/2012/06/aitabiria-ushindi-chadema-uchaguzi-mkuu.html?spref=fb

Ukiona kiongozi mwandamizi wa chama tawala naye anatoa hoja kama hizi ni vugumu kuendelea kusema kuwa ni hoja za watu wasiokitakia mema Chama cha Mapinduzi. Hazibaki kuwa ni ndoto za wapinzani sasa.

Chama cha Mapinduzi ukingoni?

Katika miaka ya hivi kariubuni Chama cha Mapinduzi (CCM) kimejikuta kikaangoni mara kwa mara kutokana na mpambano mkali wa kisiasa ambao unaletwa kwake na vyama vya upinzani, hasa Chama cha Demokrasia na Maendeleo (CHADEMA). Sasa dalili zinaonyesha CCM inaelekea ukingoni.

Kwenye kura zilizopigwa tarehe 1 Aprili 2012, CCM kimeshindwa kwenye uchaguzi mdogo wa jimbo la Arumeru lililoachwa wazi kutokana na kifo cha mbunge wake, Jeremiah Sumari, ambaye alikuwa mwanachama wa CCM.

Kwamba wapiga kura walewale waliyomchagua mwanachama wa CCM kuwa mbunge wao mwaka 2010 wameamua sasa kuchagua mgombea wa CHADEMA ni ishara dhahiri kuwa CCM inaendelea kupoteza imani ya Watanzania wengi.

Ni mwanzo wa mwisho wa CCM kama chama tawala? Tuanze mazoezi ya kumwita mwanachama wa chama cha upinzani “Mheshimiwa Rais”? Jibu litategemea iwapo CCM kitajiangalia upya na kuirejesha misingi ambayo ilikifanya kuwa chama kilichopigania maslahi ya wakulima na wafanyakazi. Baada ya hilo, itategemea kwa kiasi kikubwa nani atateuliwa na CCM kuwa mgombea wa urais kwenye uchaguzi mkuu ujao wa 2015.

CCM wakiendelea na muenendo wao wa sasa, muda si mrefu watahamia kwenye benchi za upinzani bungeni.

Siasa ya Tanzania: chama na sera zake, au mtu?

Kwenye picha ya hapa chini anaonekana diwani wa kata ya Muleba, Hassan Milanga wa Chama cha Wananchi (CUF), mwenye fulana nyekundu, akiteta jambo na wapiga kura wake wa mjini Muleba, ambao pia ni wafanyabiashara wa samaki. Milanga aliingia kwenye siasa mwaka 2000 na akachaguliwa kuwa diwani kwa tiketi ya Chama cha Mapinduzi (CCM).

Kutokana na kile anachokieleza kuwa ‘mizengwe’ilizomzuwia kubaki CCM wakati wa uchaguzi mkuu wa mwaka 2005 alihamia CUF, na wapiga kura wakahama naye na kumchagua kwa mara ya pili kuwaongoza kama diwani wao.

Wapiga kura wakarudia tena kufanya hivyo hivyo mwaka 2010. Ni dhahiri kuwa kwa sehemu nyingi za Tanzania wapiga kura wanachagua mtu na siyo chama. Swali: Ina maana wagombea wanapoteza muda kunadi sera wakati wa kampeni?

Mwalimu wangu, Gordian Mukiza

Mwaka jana, wakati vuguvugu za kampeni za Uchaguzi Mkuu zikiendelea nchini kote, nilifunga safari kwenda Muleba, Kagera, kumtembelea rafiki yangu Hamisi Millanga, aliyekuwa kwenye mikakati ya kutetea kiti chake cha udiwani wa kata ya Muleba kupitia Chama cha Wananchi (CUF). Safari yangu ilikuwa na nia ya kupata muelekeo wa harakati za kampeni kwenye maeneo hayo.

Mwalimu Gordian Mukiza, kushoto, na mimi.

Siku moja katika pitapita zangu mjini Muleba nilikutana na mwalimu wangu wa siku nyingi nilivyokuwa mwanafunzi wa Shycom (Shinyanga Commercial Institute) kati ya mwaka 1977 – 1979, Mwalimu Gordian Mukiza. Aliyenitambua ni yeye, pamoja na kuwa nimesheheni mvi kibao kichwani na pengine sifanani hata kidogo na nilivyokuwa Shycom.

Aliniambia kuwa alikuwa mgombea wa udiwani wa kata ya Ikondo, Wilaya ya Muleba Kusini, kupitia Chama cha Mapinduzi (CCM). Alishinda uchaguzi huo kwa kishindo, na matokeo yalikuwa kama ifuatavyo:

Wapiga kura waliyoandikishwa: 2,553

Waliyopiga kura: 1,685

Kura zilizoharibika: 64

Kura za Wagombea:

CHADEMA - Amri Kalizabona Hamisi : 254
CUF - Felician Rutwaza:                   400
CCM - Gordian Joseph Mukiza:          967

Amani Millanga bado anahoji Sera ya Majimbo ya CHADEMA (sehemu ya pili na ya mwisho)

Sehema ya kwanza ya makala ya Amani Millanga juu ya sera ya majimbo ya Chama cha Demokrasia na Maendeleo (CHADEMA) niliitoa hapa kwenye wavuti hii tarehe 31 Oktoba 2010. Niliahidi kutoa sehemu ya pili na ya mwisho, kesho yake, yaani tarehe 1 Novemba 2010. Naomba radhi kuwa sikuweza kutimiza ahadi hiyo mpaka leo hii.
 -----------------------------------------------------------
Sera za Majimbo: Utaifa na Hatima ya Amani Yetu (sehemy ya pili na ya mwisho)
Na Amani Millanga

Viongozi wawajibikaji
Suala la kiongozi kuwajibika kwa watu msingi wake mkuu ni demokrasia, utawala wa sheria unaoheshimu na kuzingatia haki, na uadilifu. Ukiwa na mfumo wa sheria unaofanya kazi vizuri na watu wenye uelewa wa haki zao, viongozi watawajibika. Ni hoja nzuri meya kuchaguliwa moja kwa moja na wananchi lakini hii haimaanishi kuwa atawajibika kwao. Mifano tunayo kila pembe ya dunia ya viongozi kuchaguliwa na watu lakini wasiwajibike kwa waliowachagua. Wapo wakuu wa nchi na serikali ambao hawachaguliwi na wananchi moja kwa moja hasa katika mfumo wa serikali za mabunge kama Uingereza, India, Australia, n.k. Hata rais wa Marekani hachaguliwi moja kwa moja na wananchi. Lakini viongozi wa nchi hizi wanawajibika kwa wananchi wao kama ambavyo meya anavyowajibika kwenye halmashauri yake. Suala la kuhumiza hapa ni uongozi bora unaoheshimu haki, utu, na sheria. Hiyo ndiyo dawa mujarabu na si serikali za majimbo. Serikali ya CCM inaongoza kwa mujibu wa sheria na viongozi wake wanawajibika kwa umma wa Watanzania.

Tanzania inaongozwa na misingi ya demokrasia hivyo basi waliopewa dhamana ya kuongoza wanayo haki ya kutoa maamuzi kwa kuzingatia maslahi ya taifa na kufuata matakwa ya wananchi. Pamoja na kuwa demokrasia yetu bado ni changa lakini upo ushirikishwaji mkubwa wa wananchi katika masuala yote yanayohusu nchi yetu katika kila ngazi ya uongozi kuanzia mtaa hadi taifa. Tuna mfumo mzuri wa uwakilishi; kubwa ni kuuboresha zaidi na kazi hiyo inafanywa na serikali ya CCM. Kusema kwamba "CCM haifanyi chochote" si kuitendea haki. Yapo mambo mengi mazuri ambayo CCM imeyafanya. Hii ni mada tofauti, inataka wakati wake muafaka kuijadili.

Majimbo si dawa ya rushwa
Mwandishi amegusia suala la rushwa na ufisadi na kwamba serikali za majimbo ndiyo suluhisho. Nigeria ina utitiri wa majimbo lakini inaongoza kwa rushwa. India na Afrika Kusini pia zinanuka rushwa. Hata Marekani kuna rushwa na ufisadi (fuatilia gavana wa Illinois alivyotaka kukiuza kiufisadi kiti cha useneta alichokiacha [Barack] Obama). Hakuna ushahidi wa kisayansi unaoonyesha kuwa serikali za majimbo ni dawa mujarabu ya rushwa na ufisadi. Hii ni dhana isiyokuwa na uzito wowote. Rushwa na ufisadi dawa yake uongozi bora, utawala wa sheria, maadili na miiko ya uongozi si serikali za majimbo.

Tanzania haijagawanywa kimakabila
Mwandishi anasema wilaya za Tanzania zimegawanywa kikabila. Si kweli kwamba wilaya zimegawanywa kwa misingi ya makabila. Kwa hili ni kumkosea heshima Baba wa Taifa Mwalimu Nyerere aliyefanya kila jitihada za kuondoa ukabila katika nchi yetu kwani wilaya nyingi zilianzishwa wakati wa uongozi wake. Wilaya ya Muleba iliyoanzishwa mwaka 1975 kwa mfano ina Wahaya wengi, lakini katika maeneo ya Kimwani kuna Wakara, Wakerewe, Wasukuma, Wazinza, na Wasubi. Ikitokea mfano Wilaya ya Bukoba ikawa na Wahaya peke yake hilo ni suala la kabila hilo kuwa sehemu hiyo na si kugawanywa kimakabila. Sengerema na Geita zina Wasukuma, Wasumbwa, na Wazinza, n.k. Mkoa wa Mara una makabila mengi sana kuliko mkoa wowote Tanzania na si Wakurya na Wajaluo tu. Kuna Wajita, Wasukuma, Wasimbiti, Waikizu, n.k. Lengo kuu la kuundwa kwa wilaya na mikoa mipya ni kurahisisha kufikisha huduma kwa wananchi. Hizi tafsiri nyingine kwamba wilaya na mikoa inaundwa kwa misingi ya kikabila ni tofauti na malengo ya serikali. Kwa kweli tafsiri kama hizi haziwezi kuijenga Tanzania.

Hivi kwa nini mnataka tuigawe Tanzania kwa mafungu ya makabila katika majimbo? Mtaweka wapi mpaka kwamba hapa ndipo mwisho wa Wasukuma na huu ni mwanzo wa Wanyamwezi? Kwamba hapa ni mwisho wa Waha na huu ni mwanzo wa Wahangaza? Mkianza kufanya hivi mtapanda mbegu ya "sisi na wao" kama alivyowahi kuonya Baba wa Taifa Mwalimu Nyerere. Na mkifika hatua hii ya "sisi na wao" hilo jimbo litakuwa limegawanyika katika "sisi ni Waziba, wao ni Wanyaihangiro, Wahamba, Wayoza, au Wanyambo, n.k." Kumbe mnakuwa hamna jimbo tena. Mkiwa hamna jimbo ina maana hamna utaifa. Hamna UTANZANIA. Matokeo yake ni nini? Tanzania inakuwa kama Nigeria au hata Somalia. Msipande mbegu chafu ya kutugawa kwani madhara yake ni makubwa sana kwetu. Hakika sera ya majimbo ni nguvu ya kuangamiza umma na utaifa!

Ajira na raslimali za kimajimbo: utengano si ushindani
Katika suala la ajira mwandishi anamaanisha kuwa Muhaya hatatoka kwenda kufanya kazi Mbeya au Mtwara. Maana yake nyingine ni kuwa jimbo fulani likiwa ni tajiri basi yale majimbo maskini yasiyo na vivutio vya ajira yataendelea kuwa nyuma daima kwani hata wale wachache wazuri walionao watachukuliwa na majimbo mengine tajiri. Huku ni kuiua Tanzania tukiwa tunaona. Hivi ni sababu gani ya msingi ya kutufanya tujigawe hivi? Mwandishi pia anaamini katika kanuni mwitu ambayo msingi wake mkuu ni mwenye nguvu, makucha na meno makali huwatafuna wadogo. Kwa mantiki hiyo sehemu zile ambazo ziko nyuma kimaendeleo zitamezwa na zile ambazo ziko mbele kimaendeleo katika mfumo wa serikali za majimbo. Hii ni dhuluma kwa umma!

Hakuna ushahidi wa kitakwimu katika nchi zenye majimbo kuwa uwepo wa serikali za majimbo umeongeza ushindani maradufu katika ajira au biashara. Ushindani ndani ya nchi haujengwi kwa majimbo. Ushindani unajengwa kwa kuweka mfumo mzuri wa elimu, ajira, biashara, na miundombinu. Ushindani hauletwi na jimbo kwa jimbo kushindana. Na kushindana katika lipi hasa ili hali vyanzo vya uchumi na ajira vinatofautiana katika maeneo mbalimbali ya nchi yetu? Sioni hoja za msingi katika dhana ya ushindani kati ya majimbo kama msingi wa kuweka utamaduni wa ushindani nchini. Hivyo dhana ya ushindani kwa mnasaba wa majimbo si sahihi.

Pamoja na kwamba Tanzania ina raslimali kila mahali si busara hata kidogo kusema kwamba raslimali za mkoa au jimbo kwa mtizamo wako zitumike kwa jimbo hilo peke yake. Nchi ni yetu sote. Haki aliyonayo Msukuma wa Geita kwa dhahabu iliyoko pale ni sawa na aliyonayo Mmakonde kwa dhahabu hiyo. Kwa hiyo tuongelee ajira na rasilimali za taifa na si majimbo. Kunufaika zaidi kwa Dar es Salaam au miji mikubwa na rasilimali za taifa ni suala la kujadiliwa na kufanyiwa kazi ili mapato ya taifa yafike kila pembe ya nchi lakini si kigezo cha kuhalalisha umajimbo. Pia sheria kama hiyo ya kukataza kuvuta sigara haihitaji mpaka uwe na serikali za majimbo. Hili ni suala la serikali kuu kupitia bunge kupitisha sheria ya kupiga marufuku kuvuta sigara katika maeneo mbalmbali yatakayotajwa katika sheria hiyo.

Hitimisho
Ndugu yangu, suluhisho la matatizo yetu liko katika kuwa na uongozi bora, utawala wa sheria unaoheshimu haki za binadamu, demokrasia ya kweli, na elimu bora kwa wote. Suluhisho haliko katika serikali za majimbo.

Umesema Tanzania ya sasa imeanza kuonyesha matabaka kati ya mtu na mtu. Je, mkiongeza tabaka la majimbo si ndiyo mtatumaliza kabisaaaa? Tabaka la jimbo na jimbo ambalo linaambatana na tabaka la umkoa, ukabila, nu udini, n.k. Hivi kweli hii ndiyo nguvu ya umma au nguvu ya kutugawanya? Hatuyahitaji mabadiliko ya kisera yasiyotoa kipaumbele kwa umoja, amani, na utaifa wetu. Mabadiliko haya yatatuvuruga badala ya kutujenga. Kwanini tufike hatua ya kutumia jeshi ili hali tunaweza kuimarisha umoja wetu zaidi kupitia mfumo tulionao sasa wa serikali za mitaa badala ya kujikaribishia matatizo kwa sera za maangamizi za majimbo?

Nakukumbusha kuwa hoja za Mwalimu bado ni hai na zenye manufaa kwa utaifa wetu na maendeleo yetu. Kubwa ni kuzitekeleza kwa umakini na uadilifu. Mafanikio makubwa ya Mwalimu [Nyerere] yako katika kuujenga utaifa wetu, kuulinda umoja wetu, maendeleo ya watu na kuifanya Tanzania kuwa kisiwa cha amani. Haya yote yalifanikiwa kwa sababu ya Tanzania kuwa taifa lisiloendeshwa kwa misingi ya ukabila, udini, na umkoa, au umajimbo. Mnataka kuturudisha kwenye nchi bila utaifa. Naamini Watanzania wanajua athari za siasa za majimbo na hawazitaki. Huu ndio ukweli unaotamalaki.

CCM wafungua tawi Uingereza, CHADEMA juu ya Mlima Kilimanjaro

Taarifa zilizonifikia hivi punde zinaeleza kuwa baadhi ya Watanzania waishiyo katika mji wa Luton Uingereza walijumuika 12 Desemba 2010 kwa ajili ya ufunguzi wa tawi jipya katika mji wa Luton, ufunguzi uliyofanyika katika hoteli ya Chiltern UK.

Taarifa hiyo, kwa hisani ya Tawi la CCM Uingereza inaendelea:

Wengi wao wanasema wana imani kubwa na CCM katika kuiongoza Tanzania kwa kuonyesha muelekeo wa kuwa na imani na vijana wasomi wachapakazi waliyoko ndani na nje ya nchi.

Ufunguzi huo ambao uliongozwa na mwenyekiti wa tawi la CCM - UK, Maina Owino, kwa kushirikiana na viongozi wengine wa CCM akiwemo Katibu Mwenezi wa Siasa, Moses Katega. Pia viongozi kutoka mashina ya Reading, Birmingham na sehemu zote za London walijumuika.


Katika hotuba yake fupi Ndugu Maina Owino alitoa changamoto nyingi za mafanikio  yaliyopatikana katika kipindi cha miaka mitano iliyopita chini ya uongozi wa Mwenyekiti wa CCM Taifa na Rais wa Jamhuri ya Muungano wa Tanzania, Mhe. Jakaya Mrisho Kikwete katika nyanja mbalimbali kama madini, elimu, ukusanyaji wa mapato ya serikali, waajiriwa wenye sifa za kukidhi nafasi za uongozi serikalini katika nyanja zote, na ujasiriamali kwa Watanzania wanaojitafutia maendeleo bila bugudha.


Changamoto kuhusu ushiriki wa vijana wasomi hapa Uingereza kuingia katika mchakato wa siasa ndani ya Chama ili kuleta mabadiliko yatakayozidi kukiimarisha Chama kisera na kuzidi kuwaletea Watanzania maendeleo katika nyanja mbalimbali kupambana na umasikini yalitolewa na katibu wa shina jipya la Luton aliyechaguliwa siku hiyo, Ndugu Abraham Sangiwa, na kuungwa mkono na wajumbe wote waliyohudhuria ufunguzi huo.


Viongozi waliochaguliwa ni:


Albert Ntmi - Mwenyekiti
Abraham Sangiwa - Katibu Mkuu
John Mbwete - Mjumbe
Sammy Martin - Mjumbe
Norman Wage - Mjumbe

Wakati huo huo, siku mbili zilizopita, nikielekea kilele cha Mlima Kilimanjaro, katika kambi ya Barafu, ambayo ni kituo cha mwisho kabla ya safari ya kufika kilele cha Uhuru niliona bendera ya CHADEMA ikipepea.

Kwa mujibu wa taarifa nilizopata toka kwa wapagazi wanaosindikiza wageni kupanda Mlima Kilimanjaro wanaojulikana miongoni mwao kama "wagumu", kutokana na kazi ngumu wanayofanya kusindikiza wageni juu ya mlima huu maarufu, shughuli za CHADEMA zimeanza juu ya Mlima Kilimanjaro miaka mitatu iliyopita.

CHADEMA hawana tawi juu ya Mlima Kilimanjaro ila nilichoshuhudia mimi na jitihada za wana-CHADEMA kupeperusha bendera ya chama chao kwenye sehemu iliyo juu kuliko zote Tanzania. Kambi ya Barafu ipo urefu wa mita 4,600 juu ya usawa wa bahari.

Uchaguzi Mkuu 2010 katika picha

Shabiki wa Chama cha Wananchi (CUF) wa jijini Mwanza akielekea kwenye mkutano wa kampeni za uchaguzi mkuu uliyohitimishwa tarehe 31 Oktoba. Mkutano huo ulihutubiwa na Prof. Ibrahim Lipumba, mgombea urais wa CUF.